Një video ku shfaqet një oficer policie në Nivelles, pak jashtë Brukselit, duke goditur në fytyrë një grua të prangosur dhe duke e shtyrë me forcë brenda një furgoni policie, është bërë virale gjatë fundjavës së kaluar. Ngjarja nxiti reagime të menjëhershme, ndërsa kryebashkiaku i qytetit njoftoi hapjen e një hetimi të brendshëm.

Pamjet, të përhapura gjerësisht në rrjetet sociale dhe të shikuara mbi 400 mijë herë vetëm në Facebook, tregojnë tre oficerë policie që përpiqen ta fusin gruan brenda një automjeti policor në zonën Nivelles-Genappe. Gruaja, e cila kishte duart e prangosura pas shpine, refuzonte të hynte në automjet, pavarësisht urdhrave të vazhdueshëm. Në një moment, kur ajo kthehet nga njëri prej oficerëve, ky i fundit e godet me shuplakë në fytyrë, përpara se ta shtyjë me forcë brenda furgonit.

Kryebashkiaku i Nivelles, Bernard De Ro, i cili drejton edhe distriktin lokal të policisë, konfirmoi hapjen e një hetimi të brendshëm mbi rrethanat e ngjarjes. Sipas tij, hetimi synon të sqarojë çfarë ka ndodhur para se të nisë regjistrimi i pamjeve, si dhe arsyen pse oficeri përdori forcë ndaj një personi që në atë moment nuk dukej se përbënte ndonjë kërcënim të drejtpërdrejtë.

Deri më tani nuk dihet pse gruaja ishte ndaluar fillimisht, as nëse ka pasur rrethana të tjera që i kanë paraprirë përballjes së xhiruar. Identitetet e gruas, si dhe të tre oficerëve të përfshirë, mbeten të panjohura, pasi fytyrat e tyre shfaqen të paqarta në pamjet e bëra publike.

🔺 Un agente de policía en Nivelles, Bélgica, abofeteó en la cara a una mujer esposada y la empujó hacia un vehículo policial cuando ella se negó a entrar. 🇧🇪 pic.twitter.com/dGE2T3b4zQ

— HispanTV (@Nexo_Latino) September 15, 2026