Rreth një e katërta e të punësuarve deklarohen me pagë deri në 50 mijë lekë në muaj, ndërsa po rritet njëkohësisht pesha e punonjësve në fashat e larta të pagave, sipas të dhënave zyrtare mbi ecurinë e pagave në tremujorin e dytë të vitit 2026.

Ndryshimi në strukturën e pagave lidhet me rritjen e pagës minimale në fillim të vitit, por edhe me rritjen e pagave në sektorë të ndryshëm të ekonomisë, mungesën e fuqisë punëtore dhe konkurrencën më të fortë mes bizneseve për të tërhequr apo mbajtur punonjësit.

Në fund të vitit 2025, para rritjes së pagës minimale, rreth një e treta e të punësuarve merrnin deri në 50 mijë lekë. Konkretisht, 12.8% paguheshin deri në pagën minimale prej 40 mijë lekësh, ndërsa 21% merrnin nga 40,001 deri në 50 mijë lekë. Në total, këto dy kategori përbënin 33.8% të të punësuarve.

Brenda gjashtë muajve, pesha e punonjësve me pagë deri në 50 mijë lekë u reduktua me rreth 8 pikë përqindje. Një pjesë e këtij ndryshimi erdhi nga vetë rritja e pagës minimale, e cila zhvendosi në fashën përkatëse punonjës që më parë deklaroheshin me paga më të ulëta.

Paralelisht, po rritet edhe pesha e punonjësve me paga më të larta, duke sinjalizuar një ndryshim gradual të strukturës së pagave drejt niveleve më të larta. Gati gjysma e të punësuarve, ose 48.3%, merrnin mbi 75 mijë lekë në muaj në tremujorin e dytë të vitit 2026.

Rritje shënohet edhe në nivelin e pagës mbi 95 mijë lekë, ku bëjnë pjesë 32.1% e të punësuarve, nga 29.4% që ishin në të njëjtin nivel në tremujorin e katërt të 2025-ës. Veçanërisht shtohet pesha e punësimit mbi 120 mijë lekë – 17.1% e totalit në tremujorin e dytë të 2026-ës, krahasuar me 14.1% në të njëjtën periudhë të vitit 2025.

Në rritjen e peshës së pagave më të larta mund të kenë ndikuar disa faktorë. Mungesa e fuqisë punëtore, e lidhur edhe me emigracionin dhe tkurrjen e popullsisë në moshë pune, po e detyron shumë biznese në sektorë të ndryshëm të ofrojnë paga më të larta për të gjetur dhe mbajtur stafin.

Një tjetër faktor është rritja e sektorit publik dhe efekti që kjo ushtron mbi sektorin privat, për profesionet ku shteti konkurron me bizneset për të njëjtën fuqi punëtore. Po ashtu, rritja e kostos së jetesës gjatë viteve të fundit po nxit kërkesën e punonjësve për paga më të larta, ndërsa kompanitë që përballen me mungesë personeli po bëjnë korrigjime më të shpejta të pagave.

Struktura e punësimit po ndryshon, me një peshë gjithnjë e më të madhe të sektorëve që paguajnë mbi mesataren, ndërsa aktivitetet me paga më të ulëta po përballen me vështirësi në mbajtjen e punonjësve.