Pas më shumë se katër vitesh proces gjyqësor në Hagë, më 16 shtator, pritet të shpallet aktgjykimi i shkallës së parë ndaj ish-presidentit të Kosovës, Hashim Thaçi, dhe ish-krerëve të tjerë të UÇK-së, Kadri Veseli, Rexhep Selimi dhe Jakup Krasniqi.

Dhomat e Specializuara të Kosovës kanë njoftuar zyrtarisht se seanca për shpalljen e vendimit do të zhvillohet të mërkurën, në orën 10:00. Seanca do të jetë publike dhe do të transmetohet në tri gjuhë – shqip, anglisht dhe serbisht.

Katër ish-drejtuesit e UÇK-së përballen me akuza për krime lufte dhe krime kundër njerëzimit, përfshirë përndjekje, burgim të paligjshëm, torturë, vrasje dhe zhdukje të detyruar. Prokuroria ka kërkuar dënime me nga 45 vite burgim për secilin prej tyre, ndërsa mbrojtja ka kërkuar lirimin e plotë të të katërve.

Tashmë vëmendja është përqendruar te Haga, ndërsa në Kosovë pritet me tension dhe interes të madh momenti kur trupi gjykues do të shpallë fatin e katër ish-drejtuesve të UÇK-së – një vendim që pritet të jetë një nga ngjarjet më të rëndësishme për vendin në vitet e fundit.