Gabriella Querino u gjet pa jetë pas tre ditësh kërkimesh, ndërsa Sean Michieli mbetet në gjendje kritike pas përplasjes së varkës së tyre me një mjet ujor rreth pesë tonësh

Një udhëtim me varkë në kanalet e Venecias është shndërruar në tragjedi për një çift të sapomartuar. 26-vjeçarja Gabriella Querino humbi jetën, ndërsa bashkëshorti i saj 25-vjeçar, Sean Michieli, ndodhet aktualisht në koma, pas një përplasjeje të rëndë në ujërat e qytetit.

Përplasja

Çifti po lundronte me një varkë të vogël të shtunën në mëngjes, kur mjeti i tyre u përplas me një anije rreth pesë tonësh. Përplasja shkaktoi fundosjen e varkës së tyre dhe la të dy bashkëshortët në gjendje kritike.

Tre ditë kërkimesh

Trupi i Gabriella Querinos, me origjinë braziliane, u gjet vetëm pas tre ditësh kërkimesh, pranë ishullit Campalto. Ajo u pikas rreth orës 09:00 nga një banor i zonës.

Në operacionin e kërkimit ishin të angazhuar policia, zjarrfikësit dhe ekipe zhytësish. Kushtet e vështira — përfshirë rrymat e forta dhe shikueshmërinë e ulët nën ujë — e kanë vështirësuar ndjeshëm procesin e gjetjes së 26-vjeçares.

Situata aktuale

Bashkëshorti i saj vijon të mbetet në gjendje kritike në spital, ndërsa autoritetet italiane po hetojnë rrethanat e sakta të përplasjes tragjike që ndodhi në ujërat e Venecias.