Zhvillohet në Hangzhou të Kinës Lindore mbledhja e 21-të e Tryezës së Rrumbullakët Kinë-BE

Në qytetin Hangzhou të Kinës Lindore u mbajt dje edicioni i 21-të i Tryezës së Rrumbullakët Kinë-BE midis Këshillit Ekonomik e Shoqëror të Kinës (CESC) dhe Komitetit Ekonomik e Shoqëror Evropian (EESC).

Tridhjetë e shtatë përfaqësues nga Kina dhe Evropa zhvilluan diskutime të thelluara mbi tema si pakësimi i varfërisë, tregtia e investimet dhe inteligjenca artificiale.

Wang Dongfeng, zëvendëskryetar dhe sekretar i përgjithshëm i Komitetit Kombëtar të Konferencës Konsultative Politike të Popullit Kinez dhe kryetar i Këshillit Ekonomik e Shoqëror të Kinës, mbajti një fjalim.

Në këtë fjalim Wang tha ndër të tjera që Kina dhe Bashkimi Evropian duhet të mbeten të përkushtuar ndaj partneritetit të tyre, hapjes e përfshirjes, si edhe multilateralizmit, për të ndihmuar në krijimin e një të ardhmeje me respekt e besim të ndërsjellë më të madh, përfitime të përbashkëta, si edhe barazi e drejtësi. Ai shtoi se Kina është e gatshme të punojë me BE-në për të shfrytëzuar mekanizmin e Tryezës së Rrumbullakët Kinë-BE, për të thelluar bashkëpunimin në të gjitha fushat dhe për të nxitur zhvillimin e shëndetshëm të marrëdhënieve dypalëshe.

Tryeza e Rrumbullakët e Shoqërisë Civile Kinë-BE u themelua në vitin 2007 pas një vendimi të marrë në Samitin e 9-të Kinë-BE të mbajtur në kryeqytetin finlandez Helsinki. Delegacionet e Këshillit Ekonomik e Shoqëror të Kinës dhe Komitetit Ekonomik e Shoqëror Evropian takohen rregullisht për të diskutuar për çështje ekonomike dhe shoqërore me interes të përbashkët.