LEZHË – Një aksident i rëndë ndodhi sot pranë kryqëzimit të Gocajve, përgjatë superstradës Lezhë-Shkodër. Sipas informacioneve paraprake, shkak i përplasjes dyshohet të ketë qenë një parakalim i gabuar nga njëri prej drejtuesve të automjeteve.

Si pasojë e përplasjes, u lënduan dy drejtues automjetesh dhe një pasagjer. Të tre u transportuan në Spitalin e Lezhës, ku ndodhen jashtë rrezikut për jetën.

Në vendngjarje mbërritën menjëherë shërbimet e Policisë Rrugore, të cilat ndërhynë për të normalizuar qarkullimin e automjeteve në aks. Grupi hetimor ka nisur punën për zbardhjen e plotë të rrethanave të aksidentit, ndërsa shkaqet e sakta pritet të konfirmohen pas përfundimit të hetimit.