Një avion luftarak italian i NATO-s rrëzoi të martën një dron në hapësirën ajrore të Lituanisë, i cili “me shumë gjasa” vinte nga Rusia, tha ministri italian i Mbrojtjes, Guido Crosetto.

Droni hyri në hapësirën ajrore të Lituanisë nga Bjellorusia, aleate e Rusisë, pas mesnate dhe u rrëzua pranë fshatit jugor Pratkunai, jo shumë larg qytetit të Kaunasit, bëri të ditur Qendra Kombëtare Lituaneze për Menaxhimin e Krizave, shkruan Reuters.

“Natën e kaluar, sërish, pilotët italianë ndërhynë dhe rrëzuan një kërcënim që me shumë gjasa vinte nga Rusia”, u tha Crosetto gazetarëve në bazën ajrore të Šiauliai-t, ku avionët luftarakë italianë janë dislokuar në kuadër të misionit të NATO-s për Mbrojtjen Ajrore të Baltikut.

“Prania e avionëve italianë këtu është dëshmia e qartë e vlerës së aleancës atlantike për Italinë dhe e asaj që do të thotë të jesh aleat”, tha ai pas takimit me ekuipazhet, së bashku me ministrin lituanez të Mbrojtjes, Robertas Kaunas.

Rusia nuk ka reaguar menjëherë ndaj incidentit. Kaunas u tha gazetarëve se droni me shumë gjasa nuk kishte pasur eksplozivë dhe se mbetjet e tij do të ekzaminoheshin.

“Atëherë do të jemi në gjendje të themi qartë nëse ky është një dron rus dhe ndoshta bëhet fjalë për një provokim, apo nëse është dron i një vendi tjetër”, tha ai.

Dronët ukrainas kanë hyrë në mënyrë të përsëritur në hapësirën ajrore të NATO-s në rajonin e Baltikut gjatë muajve të fundit. Kievi thotë se ata janë devijuar nga kursi për shkak të bllokimit të sinjaleve nga Rusia.

Alarm për dronët

Një alarm për dronë ishte dhënë më herët të martën në kryeqytetin lituanez Vilnius dhe në rajonin përreth.

Ushtria Lituaneze publikoi një video nga vendi ku droni u rrëzua, ku shfaqeshin mbetje të shpërndara në bar. Disa prej pjesëve dukeshin se ishin prej druri, ndërsa disa të tjera ishin të karbonizuara.

Avionët luftarakë të misionit të NATO-s për Mbrojtjen Ajrore të Baltikut patrullojnë qiejt e Letonisë, Lituanisë dhe Estonisë që prej anëtarësimit të vendeve baltike në aleancë në vitin 2004. Avionët e misionit kanë rrëzuar dronë ukrainas që kishin devijuar nga kursi mbi Estoni në maj, si dhe mbi Letoni në qershor dhe gusht.

Dronët ushtarakë që devijojnë dhe hyjnë në hapësirën ajrore të vendeve fqinje të Rusisë kanë shtuar shqetësimet se lufta e Rusisë në Ukrainë po përhapet përtej kufijve të NATO-s.

Ukraina ka shtuar sulmet me dronë me rreze të gjatë ndaj Rusisë, përfshirë edhe në zonën e Detit Baltik.