Prishtinë/Hagë – Kongresmeni amerikan Keith Self ka reaguar në prag të një vendimi të rëndësishëm në procesin gjyqësor ndaj ish-presidentit të Kosovës, Hashim Thaçi, dhe tre ish-drejtuesve të tjerë të Ushtrisë Çlirimtare të Kosovës (UÇK), duke shprehur shqetësimin se konsideratat politike mund të ndikojnë në vendimmarrjen gjyqësore.

Përmes një reagimi në platformën X, Self bëri thirrje që procesi të zhvillohet në mënyrë të paanshme dhe pa paragjykime politike.

“Shpresoj që drejtësia të mos ndikohet nga politika”, është në thelb mesazhi i kongresmenit amerikan, i cili argumentoi se në disa çështje të trajtuara në Hagë është vërejtur, sipas tij, një tendencë për ndërthurjen e konsideratave politike me proceset gjyqësore.

Self e lidhi procesin ndaj Thaçit dhe bashkëluftëtarëve të tij edhe me stabilitetin e brishtë në Ballkan. Ai iu referua të akuzuarve si shqiptarë që luftuan për pavarësinë e Kosovës pas viteve të shtypjes nga Serbia.

Kongresmeni paralajmëroi se tensionet e reja në rajon mund të kenë pasoja të gjera, duke e përshkruar Ballkanin si një “fuçi baruti”.

Sipas tij, përçarjet dhe tensionet në rajon mund t’u shërbejnë regjimeve shtypëse, ndërsa theksoi rëndësinë e pajtimit dhe stabilitetit.

Deklarata e Self vjen në një kohë kur vëmendja publike dhe politike është përqendruar te procesi gjyqësor në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit.

Të katër ish-drejtuesit e UÇK-së përballen me akuza për krime lufte dhe krime kundër njerëzimit, të cilat ata i kanë mohuar.