Autoritetet spanjolle kanë arrestuar një shqiptar me shumë precedentë penalë dhe një histori të gjatë kriminale, pasi tentoi t’i shmangej një kontrolli policor në Torredembarra, në Tarragona. Ngjarja ndodhi gjatë fundjavës së kaluar, kur agjentët e ARRO-s të policisë katalanase po zhvillonin një operacion trafiku, në kuadër të dispozitivit të posaçëm të vendosur për fundjavën e Diadës, me më shumë se 1.600 efektivë të shpërndarë në të gjithë vendin.

Kur agjentët tentuan të ndalonin automjetin, shoferi vuri re praninë e policisë, bëri një manovër shmangëse dhe u largua me shpejtësi të madhe. Për të parandaluar arratisjen e tij, policët hodhën në rrugë shiritin me gozhda; kur automjeti kaloi mbi të, gomat shpërthyen dhe makina nuk mundi të vazhdonte lëvizjen.

Kjo nuk e ndaloi shkelësin e ligjit, i cili braktisi automjetin dhe vazhdoi arratisjen në këmbë. Policët e ndoqën, disa në këmbë e disa të tjerë me makinë, derisa arritën ta kapin dhe ta identifikojnë, duke konfirmuar se bëhej fjalë për një person tashmë të njohur për forcat e rendit.

Sipas të dhënave, 64-vjeçari me shtetësi shqiptare disponon 46 precedentë policorë vetëm nga ‘Mossos d’Esquadra’, kryesisht për grabitje dhe vjedhje brenda automjeteve, të cilëve u shtohen edhe mbi 40 precedentë të tjerë të regjistruar nga Policia Kombëtare dhe Garda Civile spanjolle. Me arrestimin e fundit, ai ka shtuar edhe një akuzë tjetër në listë, pasi u kap duke drejtuar automjetin pa pasur leje drejtimi të vlefshme.

Forcat speciale kryen gjithashtu kontrolle në zonat përreth, për të verifikuar nëse i arrestuari kishte hedhur diçka nga dritarja e automjetit përpara se të tentonte arratisjen, por nga këto kontrolle nuk u gjet asgjë.