Ministrja e Ekonomisë dhe Financave, Delina Ibrahimaj, ka njoftuar se nga 1 janari 2027 do të dyfishohet bonusi për pensionistët, teksa vendi po i afrohet zgjedhjeve lokale të vitit të ardhshëm.

Përmes një postimi në rrjetet sociale, Ibrahimaj bëri të ditur se dyfishimi i bonusit do të prekë të gjitha kategoritë e pensionistëve, krahas vijimit të indeksimit të pensioneve. Ministrja theksoi se për këtë masë mbështetjeje është parashikuar një fond shtesë prej 22.4 miliardë lekësh në buxhetin e vitit të ardhshëm.

"Pensionistët janë në qendër të politikave tona sociale dhe rritja e të ardhurave të tyre mbetet një nga prioritetet tona," u shpreh Ibrahimaj. "Në vitin 2026 nisëm bonusin mujor, ndërsa nga 1 janari 2027 ai do të dyfishohet për të gjitha kategoritë e pensionistëve, krahas vijimit të indeksimit të pensioneve."

Sipas saj, objektivi i qeverisë është që deri në vitin 2030 pensioni i plotë të mos jetë më pak se 40 mijë lekë, ndërsa pensioni i pjesshëm jo më pak se 22 mijë lekë. "Një angazhim konkret për të rritur, hap pas hapi, të ardhurat e pensionistëve," përfundoi ministrja.