Jasin Kala, i njohur edhe si Jasin Avdyli, i dënuar me 12 vite burg në Shqipëri në kuadër të dosjeve "339" dhe "Volvo 4", është arrestuar në Belgjikë gjatë një operacioni ndërkombëtar antidrogë.

Arrestimi u realizua në kuadër të bashkëpunimit mes SPAK, Policisë së Shtetit dhe autoriteteve belge. 58-vjeçari, banues në Shijak, ishte dënuar për përfshirje në një grup kriminal të hetuar në kuadër të dosjes "Volvo 4", ndërsa mes akuzave ndaj tij figuronte edhe aktiviteti i lidhur me një laborator për përpunimin e heroinës në Has. Arrestimi në Belgjikë pritet të pasohet nga procedurat përkatëse ligjore për vuajtjen e dënimit të dhënë nga drejtësia shqiptare.

Sipas njoftimit të Policisë së Shtetit, arrestimi është pjesë e një faze të re të operacionit ndërkombëtar të koduar "The Wanted", realizuar në bashkëpunim me homologët belgë. Në kuadër të kësaj faze, shtetasi u kap dhe u arrestua me qëllim ekstradimin drejt Shqipërisë, pasi ishte shpallur në kërkim ndërkombëtar nga GJKKO si pjesëtar i një grupi kriminal të akuzuar për trafikimin dhe shitjen e sasive të mëdha të lëndëve narkotike në disa shtete.

Lokalizimi dhe kapja e tij u bënë të mundura falë bashkëpunimit të ngushtë mes specialistëve të Drejtorisë së Interpolit dhe homologëve belgë, në kuadër të një hetimi mbi trafikimin e lëndëve narkotike. Shtetasi ishte shpallur në kërkim nga Interpol Tirana, pasi Gjykata e Posaçme e Shkallës së Parë për Korrupsionin dhe Krimin e Organizuar, me vendim të datës 4 prill 2023, i kishte caktuar masën e sigurisë "Arrest në burg" për veprat penale "Prodhimi dhe shitja e narkotikëve", kryer në bashkëpunim të veçantë si pjesë e një grupi të strukturuar kriminal, si dhe për "Pastrimin e produkteve të veprës penale ose veprimtarisë kriminale" dhe "Kryerjen e veprave penale nga organizata kriminale dhe grupi i strukturuar kriminal".

Nga hetimet e kryera nga SPAK, dyshohet se 58-vjeçari ka qenë pjesë e një grupi që ka organizuar trafikimin e sasive të mëdha të lëndëve narkotike dhe shitjen e tyre në shtete të ndryshme. Gjithashtu, dyshohet se të ardhurat e përfituara nga kjo veprimtari kriminale janë investuar në dy pasuri të paluajtshme (lokale) në Shijak.

Bashkëpunimi ndërmjet Interpol Tiranës dhe homologëve belgë vazhdon për finalizimin e procedurave të ekstradimit të shtetasit të arrestuar drejt Shqipërisë.