Një automjet tip fuoristradë, i raportuar më parë si i vjedhur, është gjetur i djegur brenda një tuneli të vjetër ushtarak në zonën e Cërkovinës, në një rrugë të paasfaltuar që lidh këtë zonë me fshatrat përreth. Ngjarja u konstatua mbrëmjen e së hënës, rreth orës 23:00.

Pas alarmit të dhënë për zjarr, në vendngjarje mbërritën ekipet e zjarrfikësve, të cilat ndërhynë për shuarjen e flakëve.

Në zonë u paraqitën gjithashtu forcat e Policisë dhe grupi hetimor, që nisën procedurat standarde të verifikimit.

Nga kontrolli i numrit të shasisë rezultoi se mjeti ishte raportuar i vjedhur disa kohë më parë në fshatin Panaja.

Hetimet po fokusohen tani në mundësinë që automjeti të jetë përdorur për veprimtari të paligjshme, përpara se të përfundonte i fshehur në tunel.

Pozicioni i mjetit, në një zonë të izoluar dhe të vështirë për t’u frekuentuar, ka bërë që prania e tij të mos vihej re më herët nga banorët e zonës.

Policia ka nisur marrjen dhe administrimin e pamjeve nga kamerat e sigurisë, me synim identifikimin e personave përgjegjës për lënien e automjetit në tunel dhe rindërtimin e itinerarit të tij.

Paralelisht, po punohet për të përcaktuar kohën e saktë të sjelljes së mjetit në zonë dhe qëllimin e mundshëm të përdorimit të tij.

Si pasojë e zjarrit, flakët përfshinë edhe një sipërfaqe me bimësi pranë tunelit, duke kërkuar ndërhyrje shtesë nga shërbimi zjarrfikës për kontrollin e situatës. Hetimet vazhdojnë.