TIRANË — Agjencia Kombëtare e Planifikimit të Territorit (AKPT), në bashkëpunim me Ministrinë e Turizmit, Kulturës dhe Sportit dhe Ministrinë e Mbrojtjes, ka shpallur një konkurs ndërkombëtar arkitekture për transformimin e ish-bazës ushtarake dhe Tunelit të Nëndetëseve në Porto Palermo në një kompleks të ri publik historiko-kulturor.

Projekti synon shndërrimin e Tunelit të Nëndetëseve — një strukturë nëntokësore me gjatësi rreth 655 metra e ndërtuar gjatë periudhës së Luftës së Ftohtë me standarde mbrojtjeje antibërthamore — në Muzeun e Luftës së Ftohtë. Sipas termave të referencës së konkursit, vetë struktura e tunelit do të shërbejë si artefakti kryesor i ekspozitës muzeale.

Paralelisht me muzeun, plani parashikon rivitalizimin e ish-kazermave ushtarake, të cilat do të ripërdoren për shërbime akomodimi, gastronomi lokale dhe aktivitete edukativo-kulturore. Dokumentacioni i AKPT-së specifikon se ndërhyrja nuk synon krijimin e një destinacioni konvencional turistik apo maksimizimin e shtretërve, por zhvillimin e një modeli mikpritjeje të integruar me historinë dhe peizazhin natyror, me qëllim thithjen e vizitorëve edhe jashtë sezonit veror.

Zhvillimi i projektit do të bashkëekzistojë me funksionet ushtarake dhe mjedisore të zonës. Një pjesë e Porto Palermos, përfshirë molin e vogël dhe helipadin, do të vijojë të mbetet në përdorim operacional nga Forcat Detare Shqiptare. Po ashtu, ndërhyrjet do të respektojnë regjimin e mbrojtjes së Parkut Natyror të Gjirit të Porto Palermos, ndërsa Kalaja e Porto Palermos mbetet jashtë zonës së projektimit, duke u integruar vetëm si pjesë e peizazhit të përgjithshëm.