TIRANË — Dita e martë pritet të sjellë kushte atmosferike relativisht të paqëndrueshme në të gjithë territorin e vendit, të karakterizuara nga alternime kthjellimesh dhe vranësira mesatare deri të dendura, më të theksuara në zonat lindore dhe jugore.

Sipas shërbimit meteorologjik, në relievet kodrinore dhe malore në lindje e jug, vranësirat do të shoqërohen me reshje lokale dhe afatshkurtra shiu. Gjatë orëve të mesditës dhe pasdites, në këto zona nuk përjashtohet mundësia e shtrëngatave të izoluara.

Parametrat e tjerë meteorologjikë do të mbeten stabilë, ku era do të fryjë e lehtë me drejtim kryesor nga verilindja drejt veriperëndimit me shpejtësi mesatare deri në 7 m/s, ndërsa valëzimi në det do të jetë i ulët, i forcës 1 deri në 2 ballë.