TEHERAN — Anëtari i Kombëtares Shqiptare, Jasir Asani, ka dhënë një tjetër provë të formës së tij të lartë sportive, duke realizuar një gol spektakolar në përballjen e Ligës së Kampionëve të Azisë (AFC Champions League Elite) ku skuadra e tij, Esteghlal F.C., u përball me katarianët e Al Sadd SC.

Sulmuesi kuqezi zhbllokoi sfidën që në minutën e 9-të të takimit, kur pas një kontrolli të saktë të topit jashtë zonës, goditi me të majtën e tij karakteristike duke u ndalur vetëm në rrjetë dhe pa i lënë asnjë hapësirë reagimi portierit kundërshtar.

Goli i hershëm i Asanit i dha avantazhin dhe kontrollin e lojës ekipit iranian, i cili e thelloi rezultatin në pjesën e dytë përmes golave të Saeid Saharkhizan dhe Esmaeil Gholizadeh, duke vulosur fitoren e pastër me shifrat 3–0.

Ky fillim i mbarë edicioni konfirmon rolin e rëndësishëm të Jasir Asanit si titullar i padiskutueshëm te Esteghlal, ndërsa paraqitjet e tij pozitive mbeten një sinjal mjaft inkurajues edhe për stafin teknik të Kombëtares Shqiptare në prag të sfidave të ardhshme zyrtare.