BERLIN — Bashkëkryetarja e partisë së djathtë radikale gjermane AfD, Alice Weidel, ka kërkuar ndërprerjen e menjëhershme të gjithë ndihmës financiare e ushtarake për Ukrainën, duke pretenduar se Kievi duhet t’i kthejë Berlinit miliardat e dhëna që nga nisja e luftës.

Në një intervistë për rrjetin austriak AUF1, Weidel deklaroi se Ukraina duhet të kthejë shuma të konsiderueshme parash — duke i cilësuar si një detyrim që shkon deri në 70 miliardë euro — si dhe kërkoi kthimin e të rinjve ukrainas në moshë rekrutimi në vendin e tyre. Po ashtu, drejtuesja e AfD-së bëri thirrje për rivendosjen e furnizimit me "gaz të lirë rus" dhe mbulimin e kostove të dëmtimit të gazsjellësit Nord Stream nga ana e Kievit.

Ndaj këtyre deklaratave ka reaguar menjëherë kancelari gjerman Friedrich Merz, i cili hodhi poshtë me vendosmëri kërkesat e AfD-së. Merz konfirmoi se Gjermania do të vijojë mbështetjen ndaj Ukrainës, pasi sipas tij, Kievi po mbron edhe lirinë e Evropës.

Sipas të dhënave zyrtare të qeverisë gjermane, që nga shkurti i vitit 2022, Gjermania ka alokuar mbi 43.3 miliardë euro ndihmë civile dhe ka parashikuar rreth 57.6 miliardë euro për mbështetje ushtarake. Reagimi i Weidel vjen në një kohë kur AfD po shënon rritje në sondazhet kombëtare me rreth 28% të mbështetjes, duke u kthyer në një nga subjektet kryesore politike në vend.