TIRANË — Kryetari i Grupit Parlamentar të Partisë Demokratike, Gazment Bardhi, ka reaguar publikisht në prag të seancës që pritet të zhvillohet nesër në Gjykatën e Lartë për masën e sigurisë ndaj kryebashkiakut të Tiranës, Erion Veliaj.

Përmes një deklarate në rrjetet sociale, Bardhi pohoi se një vendim i mundshëm për lirimin e Veliajt nga paraburgimi do të përbënte "funeralin përfundimtar të Reformës në Drejtësi". Ai nënvizoi se kryebashkiaku përballet me akuza të rënda nga SPAK-u, të cilat përfshijnë 9 raste korrupsioni pasiv, pastrim parash, fshehje pasurie dhe shpërdorim detyre.

Bardhi i bëri thirrje trupës gjykuese të Gjykatës së Lartë të ruajë pavarësinë dhe të shmangë standardet e dyfishta mes qytetarëve të zakonshëm dhe zyrtarëve të lartë. Po ashtu, kreu i grupit të PD-së u kërkoi partnerëve ndërkombëtarë të ndjekin me vëmendje procesin, duke pretenduar se nga ana e ekzekutivt po ushtrohet presion mbi trupën gjykuese.