TIRANË — Një nga pjesëmarrësit në protestën e përditshme qytetare në kryeqytet ka reaguar ashpër pas një incidenti me Policinë e Shtetit gjatë tubimit të sotëm, ku pretendohet se një oficer ka ushtruar dhunë fizike ndaj një protestuesi.

Në fjalën e tij përpara të pranishmëve pranë godinës së Kryeministrisë, ai e cilësoi veprimin e policisë si goditje ndaj të gjithë qytetarëve, duke e faturuar sjelljen e forcave të rendit te klima politike dhe udhëheqja e kryeministrit Edi Rama. Sipas protestuesit, gjuha dhe veprimet e ekzekutivit nxisin përçarje jo vetëm ndaj protestuesve, por edhe ndaj grupeve të tjera shoqërore, përfshirë mësuesit, gazetarët dhe pushtetin gjyqësor.

Po ashtu, gjatë fjalës së tij ai dënoi publikisht kërcënimin ndaj gazetarit Osman Stafa, duke kërkuar hetim të menjëhershëm nga organet e drejtësisë, ndërsa u bëri thirrje protestuesve të ruajnë bashkimin dhe të vijojnë qëndresën në shesh.