TIRANË — Kryeministri Edi Rama ka vijuar publikisht replikat me përfaqësuesit e pushtetit gjyqësor lidhur me çështjen e pagave të sistemit të drejtësisë, duke e cilësuar retorikën e përdorur prej tyre si "gjuhë ultrasi që bërtet në rrugë".

Përmes një reagimi publik, kreu i ekzekutivit nëvizoi se politika e pagave është kompetencë ekskluzive e qeverisë dhe Kuvendit, duke deklaruar se asnjë trupë gjykuese nuk mund t’i imponohet apo të urdhërojë pushtetin legjislativ. Rama sqaroi se Gjykata Kushtetuese ka vetëm të drejtën të konstatojë shkeljet e normave kushtetuese, por jo t’i diktojë Parlamentit mënyrën e votimit.

Kryeministri u ndal edhe te veprimet e fundit të shoqatave të gjyqtarëve e prokurorëve, duke paralajmëruar se përdorimi i kallëzimeve apo masave përmbarimore për rritje pagash përbën një sfidë politike e juridike ndaj shtetit.

Më tej, ai konfirmoi se tryeza e dialogut institucional mbetet e hapur për datën 17 shtator, duke theksuar se komunikimi mes pushteteve të pavarura është i domosdoshëm në kuadër të procesit të anëtarësimit të Shqipërisë në Bashkimin Evropian.