ERKELENZ — Tre persona kanë humbur jetën këtë të hënë si pasojë e rrëzimit të një avioni të lehtë të tipit Cessna 172 në landin Nordrhein-Westfalen, në Gjermani.

Mjeti ajror me katër ulëse ishte nisur gjatë paradites nga zona në veri të Utrecht-it në Holandë. Pasi hyri në hapësirën ajrore gjermane, avioni u rrëzua rreth orës 11:20 në një arë pranë fshatit Gerderath, në afërsi të qytetit Erkelenz, duke u shkatërruar plotësisht nga forca e përplasjes.

Policia gjermane konfirmoi se të tre personat që ndodheshin në bord kanë ndërruar jetë në vendngjarje. Ndërsa identiteti i viktimave mbetet ende i papublikuar, ekipet e hetimit të aksidenteve ajrore kanë zbarkuar në terren për të zbardhur shkaqet teknike apo meteorologjike që çuan në rrëzimin e mjetit.