PRISHTINË — Organizata e Veteranëve të Luftës së UÇK-së (OVL-UÇK) u ka bërë thirrje anëtarëve të saj dhe qytetarëve për maturi dhe qetësi më 16 shtator, ditën kur Dhomat e Specializuara në Hagë pritet të shpallin aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Thirrja vjen në reagim ndaj njoftimit të Ambasadës së Shteteve të Bashkuara në Prishtinë, e cila ka paralajmëruar për mundësinë e protestave të mëdha dhe u ka rekomanduar qytetarëve e personelit të saj të shmangin grumbullimet, si dhe ka udhëzuar që fëmijët e stafit diplomatik të mos ndjekin mësimin atë ditë.

Nënkryetari i OVL-UÇK-së, Gazmend Syla, deklaroi se organizata nuk disponon informacione për trazira apo përkeqësim të situatës së sigurisë, duke nëvizuar se veteranët mbeten aleatë të SHBA-së. Syla i bëri thirrje gjithashtu komunitetit serb në Kosovë të shmangë çdo provokim, ndërsa shtoi se edhe pse çdo vendim i ndryshëm nga lirimi i ish-krerëve do të ishte i papranueshëm, reagimi do të jetë plotësisht brenda kuadrit ligjor dhe kushtetues.

Paralelisht, Policia e Kosovës ka konfirmuar rritjen e masave të sigurisë dhe ka zhvilluar një takim koordinues me përfaqësues të KFOR-it, EULEX-it, Ambasadës së SHBA-së, Zyrës së BE-së dhe OSBE-së. Nga ana e tyre, ekspertët e sigurisë dhe drejtuesit e instituteve lokale paralajmërojnë se institucionet duhet të ruajnë koordinimin maksimal për të parandaluar çdo përpjekje për destabilizim apo narrativë që cënon luftën e vitit 1999.