GREQI – Një person ka humbur jetën, 25 të tjerë rezultojnë të zhdukur dhe 51 persona janë shpëtuar pas fundosjes së një varke që transportonte emigrantë pranë ishullit Gavdos, në jug të Kretës.

Sipas rojes bregdetare greke, të mbijetuarit kanë deklaruar se në bord ndodheshin gjithsej 77 persona. Operacioni i kërkim-shpëtimit vijon në një zonë të gjerë detare dhe përfshin anije patrulluese, një helikopter dhe një dron. Në operacion janë angazhuar edhe anije tregtare që ndodheshin në zonë, ndërsa mbështetje po ofron edhe Frontex, agjencia e Bashkimit Evropian për menaxhimin e kufijve të jashtëm.

Autoritetet greke po përballen me kushte të vështira moti, pasi erërat e forta kanë komplikuar operacionin e kërkimit.

Zona detare mes Libisë, Kretës dhe Gavdos, me një distancë prej rreth 320 kilometrash, është kthyer vitet e fundit në një nga rrugët e përdorura nga emigrantët dhe azilkërkuesit që tentojnë të mbërrijnë në Greqi.

Autoritetet vijojnë kërkimet për personat e zhdukur, ndërsa ende nuk janë bërë të ditura kombësitë apo identitetet e viktimave dhe të mbijetuarve.

Sipas të dhënave të cituara nga Frontex, kalimet e emigrantëve në Mesdheun Lindor kanë shënuar një rënie prej rreth 25% gjatë tetë muajve të parë të këtij viti, krahasuar me të njëjtën periudhë të vitit të kaluar.