ROSKOVEC – Një ngjarje e rëndë ka ndodhur mbrëmjen e djeshme në fshatin Suk të Roskovecit, ku një 52-vjeçar ka plagosur me mjet prerës ish-vjehrrin e tij. Autori i dyshuar, i identifikuar si Bledar Bakaj, është arrestuar në flagrancë nga Policia e Fierit vetëm 30 minuta pas ngjarjes.

Sipas informacioneve zyrtare nga policia, ngjarja u regjistrua rreth orës 22:30. Bledar Bakaj ka shkuar në banesën e shtetasit Enver Grembi (ish-vjehrrit të tij, 67 vjeç), duke thyer kështu haptazi urdhrin e mbrojtjes që ishte caktuar nga Gjykata në favor të ish-bashkëjetueses së tij (vajza e 67-vjeçarit).

Pas mbërritjes në banesë, mes tyre ka nisur një konflikt për motive të dobëta, i cili ka degjeneruar në dhunë fizike. Gjatë përplasjes, Bakaj ka goditur 67-vjeçarin në këmbë me një mjet prerës (drapër).

Pas njoftimit për ngjarjen, shërbimet e Komisariatit të Policisë Fier organizuan operacionin dhe bënë të mundur kapjen e 52-vjeçarit afër banesës së tij në fshatin Mbërsh.

Ndërkohë, i plagosuri Enver Grembi u dërgua menjëherë në spital për të marrë ndihmën e nevojshme mjekësore dhe, sipas bluzave të bardha, ndodhet jashtë rrezikut për jetën.

Bledar Bakaj do të përballet me drejtësinë për veprat penale “Plagosja e rëndë me dashje” dhe “Veprime në kundërshtim me vendimin e Gjykatës”.