TIRANË – Pas protestës së zhvilluar mbrëmjen e kaluar në kryeqytet, e cila solli bllokim të qarkullimit dhe tensione në disa prej akseve kryesore, Policia e Shtetit ka nisur procedimin penal në gjendje të lirë për 20 pjesëmarrës.

Sipas njoftimit zyrtar, materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndërsa të dyshuarit do të hetohen për tri vepra penale:

“Organizimi dhe pjesëmarrja në grumbullime dhe manifestime të paligjshme”

“Pengimi i qarkullimit të mjeteve të transportit”

“Prishja e qetësisë publike”

Sipas policisë, protestuesit kanë organizuar tubime dhe kanë bllokuar lëvizjen e mjeteve e të këmbësorëve, duke sjellë paralizim të trafikut në disa pika kyçe të Tiranës, konkretisht:

Në bulevardet kryesore “Dëshmorët e Kombit”, “Bajram Curri” dhe “Gjergj Fishta”

Te sheshi “Wilson”

Në rrugët “Sami Frashëri” dhe “Abdyl Frashëri”

Grupi hetues po vijon veprimet për dokumentimin e plotë ligjor të ngjarjes dhe identifikimin e personave të tjerë të mundshëm të përfshirë në tubimin e paligjshëm.