TIRANË – Asociacioni i Gazetarëve të Shqipërisë (AGSH) ka ndërmarrë hapat zyrtarë ligjorë duke depozituar në Gjykatën Kushtetuese kërkesën për pezullimin dhe më pas shfuqizimin e rregullores së re të brendshme të Gjykatës së Posaçme (GJKKO). Dokumenti voluminoz prej 127 faqesh e cilëson rregulloren si haptazi censuruese dhe në shkelje të lirive themelore të medias.

Kreu i AGSH, Isa Myzyraj, theksoi se vendimi për t’iu drejtuar Kushtetueses vjen pas shpërfilljes së thirrjeve të vazhdueshme për dialog nga ana e institucionit të drejtësisë.

Pikat kyçe të padisë dhe shqetësimet e medias:

Cenimi i lirisë së shprehjes: Padia argumenton se rregullorja prek drejtpërdrejt lirinë e informimit dhe të shprehjes, si dy shtylla kryesore të demokracisë.

Kufizimi i mjeteve të punës: Rregullorja ndalon praninë e gazetarëve në seanca gjyqësore me celularët e tyre, duke i detyruar të mbajnë shënime vetëm me laps e letër, çka pamundëson komunikimin në kohë reale me redaksitë.

Mungesa e audio-regjistrimit: Gykata nuk lejon regjistrimin audio të seancave dhe refuzon t’ua vë në dispozicion gazetarëve materialet.

Kriteret absurde për komunikimin zyrtar: Janë vendosur formularë të papranueshëm për aksesin në grupet zyrtare të komunikimit, ndërsa një ditë para hyrjes në fuqi u mbyll grupi ekzistues në WhatsApp.

Kronologjia e konfliktit

Rregullorja e re u publikua në fund të muajit korrik (gjatë periudhës së pushimeve verore) dhe hyri zyrtarisht në fuqi më 1 shtator, pavarësisht kundërshtimeve të forta nga organizatat kombëtare dhe ndërkombëtare të medias. Këto të fundit kërkuan më parë shtyrjen e afatit dhe konsultim paraprak, thirrje të cilat u shpërfillën nga GJKKO, duke sjellë tashmë përplasjen zyrtare në Gjykatën Kushtetuese.