TIRANË – Policia e Tiranës ka neutralizuar dhe vënë në pranga autorin e një alarmi fals për bombë, i cili shkaktoi panik mëngjesin e sotëm në shkollën "Emin Duraku". Në pranga ka rënë shtetasi Mandi Jatagani, pas një operacioni të përbashkët të bluve të kryeqytetit dhe shërbimeve të Antiterrorit.

Policia e Shtetit lëshoi këtë komunikatë ku jep versionin e saj:

Specialistët e Njësisë Antiterror arrestuan për veprat penale “Njoftimi i rremë në organet e rendit” dhe “Përhapja e informatave të rreme që ngjallin panik”, shtetasin M. J., 47 vjeç.

47-vjeçari dyshohet se, rreth orës 06:30 të datës 14.09.2026, ka telefonuar Policinë e Tiranës, duke pretenduar për terrorizëm dhe lëndë të shkatërrimit në masë, në një shkollë 9-vjeçare.

Menjëherë pas telefonatës, në shkollën e sinjalizuar, shërbimet e Policisë, Njësia Antieksploziv dhe Njësia Antiterror kanë kryer veprimet e nevojshme verifikuese, nga të cilat rezultoi se informacioni ishte i rremë dhe se nuk kishte lëndë të tilla të rrezikshme.

Nga verifikimet e mëtejshme rezultoi se shtetasi M. J. e ka publikuar këtë informacion të rremë edhe në rrjetet sociale.

Materialet procedurale do t’i referohen Prokurorisë së Tiranës, për veprime të mëtejshme.