TIRANË — Në periudhën 18-vjeçare mes viteve 2008 dhe 2025, vendet e Bashkimit Evropian kanë dhënë gjithsej 1,082,224 leje qëndrimi për herë të parë për shtetasit shqiptarë, sipas të dhënave të Eurostat të përpunuara nga revista Monitor.

Bilanci i migrimit tregon se ritmet e largimeve janë përshpejtuar ndjeshëm në dekadën e fundit. Përgjatë periudhës 2017–2025 janë dhënë 573 mijë leje qëndrimi, duke tejkaluar periudhën 2008–2016 (509.5 mijë leje). Kjo rrjedhje e forcave të punës paraqet një peshë më të madhe demografike sot, kur popullsia e vendit është zvogëluar në 2.3 milionë banorë.

Përveç rritjes së volumit, të dhënat pasqyrojnë edhe një ndryshim të gjeografisë së emigrimit:

Italia dhe Greqia: Vijojnë të mbajnë peshën kryesore historike me përkatësisht 500 mijë dhe 311 mijë leje qëndrimi të dhëna që nga viti 2008, megjithëse pesha e tyre e përbashkët ka rënë nga 90% në 62% gjatë dekadës së fundit.

Gjermania: Është shndërruar në destinacionin kryesor për krahun e kualifikuar të punës, duke dhënë gjithsej 124 mijë leje që nga viti 2008.

Vetëm gjatë vitit 2025, shtetet e BE-së emituan 68,653 leje qëndrimi të reja për shqiptarët (rritje prej 4% krahasuar me vitin 2024). Në këtë vit, Gjermania u rendit e dyta pas Italise me 17 mijë leje të lëshuara, e ndjekur nga Greqia me 10 mijë. Sa i përket arsyes së lëshimit të lejeve për vitin 2025, 46.3% e tyre u dhanë për bashkim familjar, 29.4% për arsye punësimi dhe vetëm 0.8% për arsimim.