FIER — Një ngjarje e rëndë ka ndodhur mbrëmjen e sotme në fshatin Suk të bashkisë Roskovec, ku një person ka goditur me mjet të fortë babain e ish-bashkëjetueses së tij pas një konflikti në banesën e këtij të fundit.

Sipas të dhënave paraprake, autori i dyshuar ka shkuar në shtëpinë e ish-partneres dhe gjatë një debati me babain e saj, shtetasin me iniciale E.G., e ka goditur atë me çekiç.

I dëmtuari është transportuar me urgjencë drejt Spitalit Rajonal të Fierit për të marrë ndihmën e nevojshme mjekësore dhe, sipas bluzave të bardha, ndodhet jashtë rrezikut për jetën.

Menjëherë pas ngjarjes, autori është larguar nga vendngjarja. Shërbimet e policisë kanë ngritur pika kontrolli dhe po punojnë për identifikimin e plotë, lokalizimin dhe kapjen e tij.