ATHINË — Shqiptari Alket Rizai, i njohur në Greqi për arratisjet e tij spektakolare nga burgjet e sigurisë së lartë, është përfshirë në një incident të ri me armë zjarri në një bar plazhi në zonën e Anavyssos në Athinë. Ngjarja ka alarmuar autoritetet helene, pasi Rizai ndodhej jashtë qelisë me leje dhe duhet të paraqitet këtë të hënë në Burgun e Domokos.

Sipas rindërtimit të dinamikës nga policia greke, konflikti nisi rreth orës 05:15 të mëngjesit për shkak të muzikës me zë të lartë në parkingun e lokalit. Pas kërkesës së pronarit për uljen e zhurmës, situata u përshkallëzua në përplasje fizike, gjatë së cilës Rizai dyshohet se nxori armën dhe qëlloi në ajër. Në konflikt u përfshi edhe një roje sigurie i lokalit me kombësi afgane, i cili po ashtu hapi zjarr.

Nga rikosheti i plumbave mbetën të plagosur dy punonjës të biznesit — një 20-vjeçar grek dhe një 41-vjeçar pakistanez — të cilët morën ndihmë mjekësore në Qendrën Shëndetësore të Kalivisë. Pas incidentit, Rizai u largua nga vendngjarja bashkë me dy shoqëruesit e tij, ndërsa roja afgan është shpallur në kërkim. Nga ana tjetër, pronari i lokalit u arrestua nga policia për dëshmi të rreme.

Autoritetet helene kanë ngritur nivelin e gatishmërisë për lokalizimin e Alket Rizait. Nëse ai nuk paraqitet brenda afatit zyrtar të së hënës në Burgun e Domokos, do të konsiderohet zyrtarisht i arratisur nga drejtësia.