Piloti i skuadrës Mercedes, Kimi Antonelli, ka fituar Çmimin e Madh të Spanjës në Madrid, duke regjistruar fitoren e tij të tetë për këtë sezon dhe duke thelluar më tej diferencën në krye të kampionatit botëror të Formula 1.

Antonelli triumfoi në garën e parë të zhvilluar në pistën e re "Madring", duke lënë pas Max Verstappen dhe Lando Norris. Edhe pse e nisi garën nga vendi i dytë pas Norris, piloti italian shfrytëzoi me sukses fazën e Virtual Safety Car dhe një ndalesë jo të mirë në bokse të McLaren për të marrë kryesimin e garës.

Pas këtij rezultati, 20-vjeçari kryeson renditjen e përgjithshme me 292 pikë, i ndjekur nga shoku i tij i skuadrës, George Russell, i cili mban vendin e dytë me 211 pikë. Diferenca mes dy pilotëve të Mercedesit është thelluar në 81 pikë.

Podiumi i garës u kompletua nga Max Verstappen në vendin e dytë dhe Lando Norris në të tretin, ndërsa Charles Leclerc dhe George Russell u pozicionuan përkatësisht në vendin e katërt dhe të pestë. Me tetë fitore në 14 garat e zhvilluara të sezonit 2026, Antonelli konsolidon pozitat për titullin kampion, kur mbeten edhe nëntë gara deri në përfundim të kampionatit.