Kuvendi i Republikës së Kosovës ka miratuar përbërjen e qeverisë së re të kryesuar nga Albin Kurti me 62 vota për, tetë kundër dhe asnjë abstenim, gjatë një seance ku partitë kryesore të opozitës refuzuan të merrnin pjesë.

Në sallën plenare ishin të pranishëm vetëm deputetët e Lëvizjes Vetëvendosje dhe ata të Listës Serbe, ndërsa përfaqësuesit e PDK-së, LDK-së dhe AAK-së braktisën seancën. Partia Demokratike e Kosovës ka bërë të ditur se do ta dërgojë çështjen e konstituimit të Kuvendit dhe votimit të qeverisë në Gjykatën Kushtetuese.

Gjatë fjalës së tij përpara votëbesimit, Kryeministri Albin Kurti mbrojti luftën e Ushtrisë Çlirimtare të Kosovës duke e cilësuar të padrejtë procesin gjyqësor ndaj ish-krerëve të saj në Hagë. Kurti paraqiti gjithashtu prioritetet ekonomike e sociale të mandatit të ri, ku përfshihen rritja e pagës mesatare në sektorin privat në 1,000 euro, profilizimi i universiteteve, si dhe mbulimi falas i një sërë shërbimeve shëndetësore.

Kabineti i ri qeveritar përbëhet nga një strukturë e zgjeruar me 20 ministri dhe tri poste zëvendëskryeministrash.

Në krye të dikastereve kryesore janë vendosur:

Glauk Konjufca – Zëvendëskryeministër i parë dhe Ministër i Punëve të Jashtme dhe Diasporës

Donika Gërvalla – Zëvendëskryeministre e dytë dhe Ministre e Drejtësisë

Fikrim Damka – Zëvendëskryeministër i tretë për Çështje të Pakicave dhe Bashkëpunim

Hekuran Murati – Ministër i Financave

Andin Hoti – Ministër për Punë, Familje dhe Vlerat e Luftës Çlirimtare

Ejup Maqedonci – Ministër i Mbrojtjes

Xhelal Sveçla – Ministër i Punëve të Brendshme

Lulëzon Jagxhiu – Ministër i Administratës Publike dhe Digjitalizimit

Arben Vitia – Ministër i Shëndetësisë

Hajrulla Çeku – Ministër i Arsimit dhe Shkencës

Saranda Bogujevci – Ministre e Kulturës dhe Turizmit

Blerim Gashani – Ministër i Sportit dhe Rinisë

Elbert Krasniqi – Ministër i Administrimit të Pushtetit Lokal

Fitore Pacolli – Ministre e Mjedisit dhe Planifikimit Hapësinor

Armend Muja – Ministër i Bujqësisë, Pylltarisë dhe Zhvillimit Rural

Dimal Basha – Ministër i Infrastrukturës dhe Transportit

Mimoza Kusari-Lila – Ministre e Tregtisë, Industrisë dhe Ndërmarrësisë

Artane Rizvanolli – Ministre e Ekonomisë

Nenad Rashiç – Ministër për Komunitete dhe Kthim

Rasim Demiri – Ministër për Zhvillim Rajonal