Një konflikt mes rreth 15 personash në zonën e Kypselit përfundoi me plagosjen e një 40-vjeçari me origjinë indiane. Policia greke ka arrestuar tre persona, mes tyre një 36-vjeçar me origjinë shqiptare.

ATHINË – Një përleshje e rëndë mes rreth 15 personash ka ndodhur mbrëmjen e së shtunës në zonën e Kypselit, në Athinë, duke lënë të plagosur një 40-vjeçar me origjinë indiane.

Ngjarja është regjistruar rreth orës 21:00, në kryqëzimin e rrugëve Lefkados dhe Evelpidon, ku një konflikt mes disa personave ka degjeneruar në përleshje fizike.

Gjatë konfliktit, 40-vjeçari është goditur me një mjet të mprehtë në bark dhe kofshë. Ai është transportuar në spital për të marrë ndihmë mjekësore.

Pas ngjarjes, autoritetet greke kanë ndërhyrë dhe kanë arrestuar tre persona, të dyshuar për përfshirje në konflikt.

Në pranga kanë përfunduar dy shtetas grekë, të moshave 26 dhe 30 vjeç, si dhe një 36-vjeçar me origjinë shqiptare.

Sipas autoriteteve, tre të arrestuarit po procedohen për veprën penale të plagosjes së rrezikshme trupore në bashkëpunim.

Ndërkohë, hetimet vijojnë për të zbardhur shkaqet e konfliktit dhe rolin e secilit prej personave të përfshirë. Policia po punon gjithashtu për identifikimin e personave të tjerë që kanë marrë pjesë në përleshje.

Autoritetet greke pritet të mbledhin prova dhe dëshmi të tjera për të përcaktuar dinamikën e plotë të ngjarjes dhe rrethanat që çuan në plagosjen e 40-vjeçarit.