Mbahet sesioni i dytë i Samitit të 18-të të BRICS-it

Sesioni i dytë i Samitit të 18-të të BRICS-it u mbajt sot në Nju-Delhi të Indisë, në kryesimin e kryeministrit indian, Narendra Modi, raporton noa.al.

Në këtë sesion, morën pjesë edhe presidenti i Kinës Xi Jinping, ai i Rusisë Vladimir Putin, i Afrikës së Jugut Cyril Ramaphosa, i Iranit Masoud Pezeshkian, i Egjiptit Abdel Fattah El-Sisi dhe i Indonezisë, Prabowo Subianto.

Gjithashtu morën pjesë kryeministri i Etiopisë Abiy Ahmed Ali, princi i kurorës i Abu-Dabit të Emirateve të Bashkuara Arabe Sheikh Khaled bin Mohammed bin Zayed Al Nahyan.

Në këtë sesion nuk munguan as ministrat e jashtëm të Brazilit dhe Arabisë Saudite, udhëheqës ose përfaqësues të vendeve partnere dhe të ftuara të BRICS-it, si dhe drejtues të organizatave ndërkombëtare, përfshirë sekretarin e përgjithshëm të OKB-së Antonio Guterres.

Presidenti kinez Xi Jinping në fjalën e tij u ndal te "konsolidimi i themeleve të bashkëpunimit të BRICS-it dhe fuqizimi i Jugut Global."

Ndër të tjera ai vuri në dukje që aktualisht bota po kalon ndryshime të përshpejtuara, ndërsa ngritja kolektive e Jugut Global është bërë një forcë kyçe për promovimin e shumëpolarizimit global. Në të njëjtën kohë, situata ndërkombëtare është e ndërthurur dhe e turbullt, me rreziqe dhe sfida të ndryshme që shfaqen njëra pas tjetrës.

Presidenti tha se vendet e Jugut Global duhet të mbrojnë së bashku sundimin e ligjit dhe të respektojnë barazinë sovrane, mosndërhyrjen në punët e brendshme, zgjidhjen paqësore të mosmarrëveshjeve dhe normat e tjera themelore të marrëdhënieve ndërkombëtare, duke siguruar zbatimin e barabartë të ligjit dhe rregullave ndërkombëtare dhe duke shmangur standardet e dyfishta.