KOSOVË – Kuvendi i Kosovës ka përfunduar procesin e konstituimit, ndërsa në përfundim të seancës janë zgjedhur katër nga pesë nënkryetarët e legjislativit.

Nga Lëvizja Vetëvendosje, në postin e nënkryetarit u zgjodh Ardian Gola, ndërsa Kujtim Shala do ta përfaqësojë Lidhjen Demokratike të Kosovës në kryesinë e Kuvendit.

Nga komuniteti serb, në pozitën e nënkryetares u zgjodh Tanja Vujoviç, ndërsa nga komunitetet joshumicë u zgjodh Emilija Rexhepi.

Pozita e pestë e nënkryetarit, e cila i takon Partisë Demokratike të Kosovës, mbeti e paplotësuar. PDK-ja bojkotoi seancën konstituive dhe pezulloi kandidaturën e Vlora Çitakut, duke e lidhur çështjen me një vendim të ardhshëm të Gjykatës Kushtetuese.

Me zgjedhjen e katër nënkryetarëve, Kuvendi ka përmbyllur pjesën kryesore të procesit të konstituimit, ndërsa mbetet për t’u zgjidhur edhe çështja e përfaqësimit të PDK-së në kryesinë e Kuvendit.