Republika Demokratike e Kongos po përballet me shpërthimin më të rëndë të Ebolës në historinë e vendit, ku autoritetet shëndetësore kanë konfirmuar deri tani 7,022 raste të infektimeve dhe 3,998 viktima.

Epidemia, e shpallur zyrtarisht në muajin maj, mbetet e përqendruar kryesisht në provincën Ituri. Së fundmi, prania e virusit u raportua edhe në provincën Ubangi Jugor, duke e çuar në shtatë numrin e provincave të prekura nga përhapja e infeksionit.

Zëdhënësi i qeverisë, Patrick Muyaya, deklaroi se kulmi i epidemisë është kaluar gjatë javës së tretë të gushtit dhe se lakorja e infeksioneve të reja ka nisur të shënojë rënie. Deri më tani, 1,671 persona janë deklaruar të shëruar plotësisht nga virusi.

Pavarësisht kësaj ecurie, autoritetet shprehin shqetësim për shkak të shfaqjes së rasteve të reja në shkolla në prag të fillimit të vitit të ri shkollor. Sfidë kryesore mbetet mungesa e theksuar e burimeve financiare dhe e personelit mjekësor në terren.

Organizata Botërore e Shëndetësisë ka bërë me dije se nevojitet mobilizimi i rreth 5,000 punonjësve të tjerë shëndetësorë për të përballuar situatën emergjente.

Kjo valë epidemike po shkaktohet nga lloji "Bundibugyo" i virusit Ebola. Për këtë lloj specifik nuk ka ende një vaksinë apo trajtim përfundimtar të miratuar, ndërsa vaksina dhe kura eksperimentale vazhdojnë t’i nënshtrohen testimeve klinike.