I ftuar në emisionin "S’e Luan Topi" në Top Channel përballë moderatores Erjona Rusi, Pastor Paulin Vilajeti ka rrëfyer dy histori të veçanta nga shtëpia e fëmijës që ai ka themeluar, duke ndarë detaje prekëse mbi jetën e fëmijëve të strehuar prej tij.

Gjatë rrëfimit, pastori tregoi historinë e fëmijës së parë të marrë në kujdestari, i cili ishte braktisur nga e ëma në kushte extreme në Berat.

Lidhur me këtë ngjarje dhe fatin e djalit, Pastor Paulin Vilajeti u shpreh: “Fëmija i parë që morëm ishte një djalë që mamaja e kishte çuar në breg të lumit në Berat dhe e kishte qëlluar me gurë për ta vrarë dhe e dinte të vdekur fëmijën. Ne e shpëtuam, sepse e kishte dëgjuar policia duke qarë dhe ne e strehuam. Ai sot është i martuar. Është një ndër njerëzit më të njohur në Tiranë”.

Pastori tregoi edhe rastin e një vajze të marrë që foshnjë nga materniteti i Beratit, e cila në moshën 17-vjeçare kërkoi të takonte nënën e saj biologjike. Gjatë kontaktit telefonik me të ëmën, u zbulua se kësaj të fundit i kishin thënë në lindje se fëmija kishte ndërruar jetë, duke zbuluar kështu të vërtetën pas shumë vitesh.