Rusia ka rikthyer praninë e saj ushtarake detare në Detin Mesdhe duke dërguar dy grupe anijesh të ngarkuara me pajisje ushtarake drejt portit sirian të Tartusit. Sipas raportimeve të "The Maritime Executive", ky zhvillim shënon një ndryshim të menjëhershëm të situatës strategjike krahasuar me muajin korrik, kur Rusia nuk kishte asnjë anije luftarake në rajon për herë të parë që nga viti 2013.

Grupi i parë i mjeteve detare ruse, i cili hyri në Mesdhe përmes Ngushticës së Gjibraltarit më 27 gusht pas një monitorimi të rreptë nga Marina Mbretërore britanike, përfshin destrojerin kundër nëndetëseve “Admiral Levchenko”, anijen e mallrave “Sparta”, cisternën “General Skobelev” dhe anijen furnizuese “Akademik Pashin”. Mjetet detare mbërritën në Tartus më 7 shtator, ku imazhet satelitore konfirmuan shkarkimin e ngarkesave ushtarake në port.

Përgjatë ditëve të fundit është diktuar edhe një grup i dytë detar rus që lëviz mes Siçilisë dhe Tunizisë nën vëzhgimin e Forcave Ajrore Italiane. Ky konvoj kryesohet nga anija desantuese e armatosur “Aleksandr Shabalin” dhe përfshin dy anije mallrash nën sanksione, “Anastasiia” dhe “Yuriy Arshenevskiy”, të cilat përdoren për transportin e mjeteve dhe pajisjeve ushtarake.