Gjatë ditës së 105-të të protestës përpara godinës së Kryeministrisë në Tiranë, pjesëmarrësit nga diaspora dhe aktivistët vendorë paralajmëruan se do të vijojnë tubimin deri në plotësimin e kërkesave të tyre për dorëheqjen e kryeministrit Edi Rama.

Në fjalën e tyre para turmës, protestuesit iu drejtuan edhe efektivëve të Policisë së Shtetit të pranishëm në kordonin e sigurisë, duke u kërkuar të hiqnin kapelet e të bashkoheshin me tubimin.

Në prononcimet e bëra gjatë maratonës së protestës, një nga pjesëmarrësit deklaroi: “Do qëndrojmë për shqiptarinë. Nata është e gjatë, nesër dita gjithashtu. Do rrimë këtu, të njihemi me njëri-tjetrin, derisa ta largojmë kryeministrin Edi Rama. Shqiptarët janë bashkë për t’i thënë stop tradhtarëve. Vetëm bashkë e sjellim ndryshimin”.