Policia greke ka zbuluar një tjetër sasi prej 26.8 kilogramësh kokainë gjatë kontrolleve të ushtruara nga strukturat e DEOS-it në një ndërtesë pranë vilës ku u arrestua Lulzim Caka. Prona ku u gjet lënda narkotike rezulton në pronësi të të njëjtit person që ia kishte dhënë me qira banesën organizatës kriminale.

Lënda narkotike ishte e paketuar në pllaka me shenja të veçanta stampimi, të cilat përputhen me format e presave të sekuestruara gjatë aksionit të 9 shtatorit. Përveç kokainës, autoritetet sekuestruan një thikë me gjatësi 21 centimetra dhe fishekë të kalibrave të ndryshëm.

Sipas hetimit, sasia e re ishte pjesë e të njëjtit linjë importi të paligjshëm nga Kolumbia, ku lënda narkotike me përqindje të lartë pastërtie transportohej e fshehur brenda buqetave të luleve artificiale.

Droga ishte fshehur në mënyrë të mirëorganizuar në një strukturë nëntokësore dhe brenda një depozite uji në një ndërtesë në ndërtim e sipër. Hetimet e policisë greke vijojnë për zbardhjen e plotë të rrjetit dhe identifikimin e personave të tjerë të përfshirë.