Detaje të reja janë zbardhur në lidhje me arrestimin e Lulzim Cakës gjatë aksionit të policisë greke në Athinë. Pas prangosjes së tij si drejtues i një grupi të trafikimit të lëndëve narkotike, autoritetet kanë ushtruar kontroll në banesë ku kanë sekuestruar dy milionë euro cash, lëndë narkotike dhe sende me vlerë.

Caka, i njohur ndryshe si “Lul Caka”, përbën një nga emrat më të njohur të kronikës së zezë në Shqipëri gjatë viteve ’90. Veprimtaria e tij kriminale ka qenë e përqendruar kryesisht në boshtin Berat-Fier-Lushnjë gjatë trazirave të vitit 1997.

Në historikun e tij gjyqësor, ai rezulton i dënuar për vrasjen e Pëllumb Eminit, ngjarje e ndodhur më 21 korrik 1997 në Lushnjë. Po ashtu, Caka është dënuar edhe për sulmin me armë ndaj dy drejtuesve të policisë, Gani Malushi dhe Ilir Ngresi, ngjarje e regjistruar në mars të vitit 1998.

Për këto episode kriminale, përfshirë tentativën e vrasjes së zyrtarëve të policisë dhe armëmbajtjen pa leje, ndaj tij u vendos një dënim përfundimtar prej 25 vitesh burgim, i cili u la në fuqi nga Gjykata e Apelit pavarësisht pretendimeve të tij mohuese.