Kryeministri Edi Rama ka reaguar publikisht pas protestës së zhvilluar në Vlorë kundër ndërtimit të Muzeut Hebraik, e cila u shoqërua me tensione dhe ndërhyrjen e policisë. Protestuesit kundërshtuan punimet me pretendimin se po prekshatërrohet godina historike e Klubit Patriotik “Labëria” (Muzeu Etnografik).

Rama i ka hedhur poshtë këto pretendime, duke sqaruar se Muzeu Hebraik po ndërtohet në një tjetër godinë të vitit 1850 pranë Muzeut Etnografik. Përveç kësaj, ai njoftoi se Fondi Shqiptaro-Amerikan i Zhvillimit ka akorduar 200 mijë dollarë për projektin e rijetësimit të vetë Muzeut “Labëria”.

Më poshtë është deklarata e plotë e Kryeministrit Edi Rama:

“Një grup delenxhinjsh me në krye Lesko pijanikun kanë mësyrë sot në kantierin e Muzeut Hebraik të Vlorës – një gur themeli i kujtesës historike të qytetit të Pavarësisë e të lavdisë në mbrojtjen e hebrenjve gjatë Luftës së Dytë Botërore – me pretendimin pervers dhe shpifarak se medemek po u shkatërroka Muzeu Labëria ose ndryshe Muzeu Etnografik.

Çeta e Lesko Pijanikut e ka zakon këtë ritual sulmesh mbi kantieret e transformimit epokal të Vlorës, por populli vlonjat duhet ta dijë që me kërkesën time, Fondi Shqiptaro-Amerikan i Zhvillimit ka akorduar 200 mije USD per hartimin e projektit të Rilindjes së Muzeut Labëria, një karakatinë e degraduar totalisht që do të kthehet krahas Muzeut Hebraik në një tjetër derë të hapur krenarie të Vlorës patriotike e turistike.

Dhe Lesko Pijaniku do vrapojë tek kantieret e radhës, njësoj siç vrapon përnatë pas kecave e pulave që shoqërojnë rrëketë e rakisë në gurmazin e pangopur të tij.”