Takimi i Kryeministrit Edi Rama me strukturat e Partisë Socialiste dhe qytetarët në Pallatin e Kulturës në Vlorë është shoqëruar me tensione pasditen e së shtunës. Policia e Vlorës ka ndërhyrë duke shoqëruar në komisariat katër persona që ndodheshin në afërsi të ambientit ku zhvillohej aktiviteti.

Mes të shoqëruarve është edhe aktivisti Baki Goxhaj, i cili dyshohet si një nga organizatorët e një proteste të planifikuar nga një grup qytetarësh. Të pranishmit po prisnin përfundimin e takimit për të shprehur pakënaqësitë e tyre lidhur me disa çështje me interes vendor e kombëtar, përfshirë zhvillimet në Zvërnec, projektin e Muzeut Hebre dhe Reformën Territoriale.

Në pamjet filmike të shpërndara në rrjetet sociale, dokumentohet çasti i ndërhyrjes së forcave të rendit, ku dëgjohen edhe reagimet e ashpra të bashkëshortes së aktivistit ndaj oficerëve të policisë gjatë shoqërimit të tij.