Tiranë, 12 shtator 2026 – Ish-presidentja e Kosovës, Vjosa Osmani, ka folur për të ardhmen e saj politike, mundësinë e një rikthimi në drejtimin e Lidhjes Demokratike të Kosovës (LDK), si dhe për një kandidim të mundshëm për postin e kryeministres.

E ftuar në emisionin “Inside Albania” në Euronews Albania, Osmani tha se aktualisht nuk ka një vendim përfundimtar për të ardhmen e saj politike. Ajo theksoi se, në këtë fazë, dëshiron t’i rikthehet mësimdhënies dhe t’i kushtojë më shumë kohë familjes.

“Ka pasur kaq shumë raste në jetën time kur kam thënë: Në rregull, politika ka mbaruar për mua. Dua të kthehem te mësimdhënia”, u shpreh Osmani, duke shtuar se zhvillimet politike në Kosovë kanë qenë shpesh të paparashikueshme.

Sipas saj, në këtë moment prioritet është rikthimi te mësimdhënia, kalimi i më shumë kohe me familjen dhe vijimi i angazhimit në disa prej kauzave me të cilat është marrë gjatë periudhës së presidencës.

E pyetur nëse do të konsideronte në të ardhmen drejtimin e LDK-së, Osmani nuk dha një përgjigje përfundimtare, duke lënë të hapur mundësinë që vendimi të varet nga zhvillimet politike dhe rrethanat e së ardhmes.

Sa i përket një kandidimi të mundshëm për kryeministre të Kosovës, Osmani kujtoi se këtë mundësi e kishte shqyrtuar më herët dhe se kishte kandiduar për këtë post në vitin 2019.

Megjithatë, ajo tha se aktualisht nuk e sheh veten në atë pozicion.

“Nuk ka asnjë sfidë nga e cila të kem frikë në këtë pikë të jetës. Megjithatë, nuk e kam parë vërtet, sidomos në dy vitet e fundit. Ka pasur një kohë kur po mendoja për këtë, rreth vitit 2019, kur kandidova edhe për kryeministre. Nuk jam më në atë pikë ku mendoj se kjo është ajo që dua”, deklaroi Osmani.

Pavarësisht kësaj, ish-presidentja nuk e përjashtoi kategorikisht një rikthim të mundshëm në garën për kryeministre, duke theksuar se zhvillimet politike mund të ndryshojnë në mënyrë të shpejtë.

“Do të shohim se si do të shkojnë gjërat. Nuk është diçka që planifikoj apo dëshiroj në këtë pikë. Por kurrë mos thuaj kurrë”, u shpreh ajo.

Deklaratat e Osmanit lënë kështu të hapur disa mundësi për të ardhmen e saj politike, ndërsa aktualisht ajo shprehet e fokusuar te mësimdhënia, familja dhe kauzat publike që ka mbështetur gjatë mandatit të saj si presidente e Kosovës.