Vala e parë e qytetarëve nga komunat e ndryshme të Kosovës ka nisur rrugëtimin drejt kryeqytetit, ku sot në orën 14:00 do të mbahet “Marshi për Liri”, i organizuar nga platforma qytetare “Liria ka Emër”. Tubimi madhështor vjen në mbështetje të ish-krerëve të Ushtrisë Çlirimtare të Kosovës (UÇK) që po gjykohen në Hagë.

Pamjet e siguruara nga qytete si Rahoveci, Suhareka, Peja, Ferizaj, Mitrovica dhe Skenderaj dëshmojnë për një interesim të lartë dhe organizim të kolonave me autobusë, me qytetarë që po i bashkohen thirrjes për pjesëmarrje masive në sheshin “Skënderbeu”.

Organizatorët kanë siguruar mbështetjen logjistike për transportin falas nga të gjitha qytetet, ndërsa pritet që pjesëmarrja të jetë e gjerë në prag të shpalljes së vendimit të Gjykatës Speciale më 16 shtator ndaj Hashim Thaçit, Kadri Veselit, Jakup Krasniqit dhe Rexhep Selimit.