Drejtoria Vendore e Policisë Durrës ka finalizuar me sukses operacionin policor të koduar “Informacioni”, duke goditur një tjetër rast të armëmbajtjes pa leje. Si rezultat i ndërhyrjes, është vënë në pranga një 30-vjeçar, i cili lëvizte i armatosur, ndërsa është proceduar penalisht edhe një shtetase që ndodhej me të.

Sipas njoftimit zyrtar, operacioni u organizua nga specialistët e Seksionit për Hetimin e Krimeve, të cilët siguruan informacione policore në rrugë operative se një shtetas qarkullonte i armatosur në qytet. Gjatë ndërhyrjes, në një apartament të marrë me qira në lagjen nr. 11 të Durrësit, u bë kapja dhe arrestimi në flagrancë i shtetasit H. K., 30 vjeç, banues në Durrës.

Gjatë kontrollit të ushtruar në çantën e dorës (marsup) të 30-vjeçarit, shërbimet e policisë gjetën dhe sekuestruan në cilësinë e provës materiale një armë zjarri tip pistoletë së bashku me municion luftarak, gati për qitje.

Në vijim të veprimeve procedurale, gjatë kontrollit në ambientet e apartamentit ku ndodhej 30-vjeçari, u shoqërua dhe u procedua penalisht në gjendje të lirë shtetasja K. Sh., 28 vjeçe, banuese në Tiranë, e cila akuzohet për veprën penale “Moskallëzimi i krimit”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme mbi veprën penale të mbajtjes pa leje të armëve dhe municionit luftarak.