Norvegji: Dy ditë pasi përcolli vëllanë në banesën e fundit, shuhet edhe princesha Astrid

Princesha Astrid ishte trajtuar për pneumoni në fillim të këtij viti, por vazhdoi të kryente detyrat mbretërore deri në orët e fundit të jetës së saj

Vetëm dy ditë pas funeralit të mbretit Harald V, familja mbretërore norvegjeze ka njoftuar ndarjen nga jeta të motrës së tij, princeshës Astrid.

“Me pikëllim të madh, Madhëria e Tij Mbreti mori lajmin se princesha Astrid është ndarë nga jeta. Princesha u shua sot, të premten më 11 shtator, në moshën 94-vjeçare”, thuhet në njoftimin e Pallatit Mbretëror.

Dalja e saj e fundit në publik ishte më 9 shtator, në Katedralen e Oslos, ku mori pjesë në ceremoninë e lamtumirës për vëllain e saj. Harald V ndërroi jetë më 28 gusht, në moshën 89-vjeçare, pasi kishte qëndruar në fron për më shumë se 35 vjet.

“Gjatë gjithë jetës së saj të gjatë, princesha Astrid e përfaqësoi Familjen Mbretërore me ngrohtësi dhe përkushtim”, deklaroi mbreti Haakon VIII.

Ai kujtoi se tezja e tij mori rolin e zonjës së parë të Norvegjisë në moshën 22-vjeçare, pas vdekjes së nënës së saj, princeshës Märtha, në vitin 1954.

Astrid e mbajti këtë rol për 14 vjet, deri në vitin 1968, kur detyra iu kalua princeshës Sonja.

Mbreti vlerësoi gjithashtu përkushtimin e saj ndaj njerëzve në nevojë dhe mbështetjen e vazhdueshme që i kishte dhënë Harald V dhe familjes mbretërore.

“Mësuam shumë prej saj dhe ajo nuk kishte kurrë frikë ta thoshte mendimin e saj. Humbja e saj është e madhe për ne. Do të na mungojë”, u shpreh ai.

Princesha Astrid ishte trajtuar për pneumoni më herët gjatë këtij viti, por kishte vazhduar të përmbushte detyrat mbretërore deri në vitet e fundit të jetës.

Ajo lindi më 12 shkurt 1932 dhe ishte fëmija i dytë i mbretit Olav V dhe princeshës Märtha, si dhe njëra prej dy motrave më të mëdha të Harald V.

Në vitin 1961 u martua me Johan Martin Ferner, fitues i medaljes së argjendtë olimpike në vela. Çifti pati pesë fëmijë. Ferner ndërroi jetë në vitin 2015, në moshën 87-vjeçare.

Me urdhër të mbretit, flamuri në Pallatin Mbretëror u ul në gjysmështizë. E njëjta gjë do të ndodhë edhe ditën e funeralit të princeshës Astrid.