Një operacion i përbashkët dhe i koordinuar mes autoriteteve policore greke dhe atyre shqiptare ka çuar në goditjen e një rrjeti të trafikut ndërkombëtar të kokainës, e cila trafikohej nga Kolumbia e fshehur mes dërgesave me trëndafila. Detajet e këtij aksioni të bujshëm në Athinë janë bërë të ditura nga Drejtori i Përgjithshëm i Policisë së Shtetit, Skënder Hita.

Gjatë operacionit të zhvilluar në kryeqytetin grek, policia ka sekuestruar një sasi të konsiderueshme lënde narkotike kokainë dhe ka vënë në pranga disa shtetas shqiptarë të përfshirë në këtë aktivitet kriminal.

Sipas deklaratave të kryepolicit Hita, një nga personat e arrestuar gjatë këtij aksioni rezulton të jetë një individ me rrezikshmëri të lartë, i cili ishte shpallur në kërkim ndërkombëtar dhe rezulton i dënuar në Shqipëri për veprën penale të vrasjes. Për arsye konfidencialiteti të hetimeve në vazhdim, identiteti i tij nuk është bërë ende publik.

Hita theksoi rëndësinë e bashkëpunimit ndërkombëtar, duke bërë me dije se Policia e Shtetit ka shkëmbyer informacione në kohë reale me homologët grekë.

Ndërkohë, strukturat hetimore shqiptare kanë nisur verifikimet dhe hetimet e pavarura për të zbardhur të gjithë rrjetin e bashkëpunëtorëve dhe shtrirjen e këtij grupi kriminal edhe brenda vendit.