Detaje të reja kanë dalë në dritë lidhur me shpërthimin e fuqishëm që tronditi në orët e para të mëngjesit zonën e Bathores në Kamëz, ku u vendos lëndë plasëse në portën e banesës së 36-vjeçarit Mariglen Lala. Grupi hetimor dyshon se akti ka shërbyer si një mesazh paralajmërues ndaj tij, ndërsa motivet e sakta mbeten ende nën hetim.

Në fokus të hetimeve është vënë e kaluara kriminale e 36-vjeçarit. Sipas të dhënave paraprake, Lala është liruar nga burgu pak kohë më parë, pasi ka përfituar nga amnistia e fundit penale, ndërkohë që më parë rezulton i dënuar për vepra të ndryshme penale, përfshirë vjedhje, plagosje dhe mashtrim.

Policia po verifikon mundësinë që ngjarja të lidhet me aktivitetet e mëparshme apo konfliktet e mundshme të 36-vjeçarit. Shpërthimi ndodhi rreth orës 03:35 në rrugën “Rozafa” në Bathore, duke shkaktuar vetëm dëme materiale në hyrjen e banesës, ndërsa strukturat përkatëse vijojnë punën për identifikimin dhe kapjen e autorëve.