Në prag të nisjes së vitit të ri shkollor, autoritetet kanë paralajmëruar masa të shtuara për garantimin e sigurisë fizike, shëndetësore dhe digjitale të nxënësve. Fokusi kryesor do të jetë te terreni, ku përgjegjësia do të jetë konkrete dhe e ndarë në disa drejtime kyçe, përfshirë luftën ndaj narkotikëve, sigurinë rrugore dhe atë ushqimore.

Specialistët kundër narkotikëve janë udhëzuar të organizojnë kontrolle të vazhdueshme brenda dhe jashtë perimetrit të sigurisë, me qëllim parandalimin dhe ndalimin e përdorimit të lëndëve narkotike nga nxënësit. Po ashtu, strukturat e krimit kibernetik dhe ato kundër dhunës do të jenë aktive në institucionet arsimore për të luftuar dukurinë e bullizmit. Për sa i përket sigurisë rrugore, forca të shtuara policore do të angazhohen gjatë kohës së pushimit të gjatë për të mbrojtur fëmijët dhe të rinjtë.

Një vëmendje e veçantë i është kushtuar edhe sigurisë ushqimore pranë mjediseve shkollore. Në bashkëpunim të ngushtë me Autoritetin Kombëtar të Ushqimit (AKU), do të ketë kontrolle periodike në bizneset përreth shkollave, duke verifikuar skadencën e produkteve dhe respektimin e kushteve higjeno-sanitare. Autoritetet theksojnë se parandalimi mbetet më i rëndësishëm se reagimi, ndaj po forcohet bashkëpunimi ndërinstitucional mes mësuesve, psikologëve, oficerëve të sigurisë dhe bordit të prindërve.

Në kuadër të modernizimit dhe nismës "Smart City", në 20 shkollat e para janë instaluar tashmë kamera inteligjente. Përdorimi i kësaj teknologjie synon t’i japë mundësi strukturave përkatëse që të reagojnë me shpejtësi ndaj çdo situate të mundshme dhe të jenë më pranë komunitetit shkollor.