Një ngjarje e pazakontë ka ndodhur mbrëmjen e së premtes në qytetin e Korçës, ku një autoambulancë ka përplasur një të moshuar që po lëvizte me biçikletë në afërsi të bibliotekës së qytetit. Për pasojë, drejtuesi i mjetit të urgjencës ka përfunduar në pranga pasi rezultoi se po drejtonte nën efektin e alkoolit.

Sipas informacioneve nga Policia, i moshuari po kalonte rrugën me biçikletë në momentin e përplasjes. Pas aksidentit, vetë shoferi i ambulancës ka vepruar shpejt duke e transportuar të dëmtuarin në spital, ku ai ka marrë ndihmën e nevojshme mjekësore dhe fatmirësisht ndodhet jashtë rrezikut për jetën.

Gjatë verifikimeve në vendngjarje, shërbimet e policisë i kanë bërë testin e alkoolit drejtuesit të ambulancës, i identifikuar me inicialet E.Q., rreth 44 vjeç. Testimi ka dëshmuar se ai ka qenë nën efektin e pijeve alkoolike gjatë orarit të punës, duke sjellë arrestimin e menjëhershëm të tij për veprat penale të drejtimit të mjetit në gjendje të dehur dhe shkaktimit të aksidentit.